Բաց դաս հայ գրականությունից

Posted by: | Posted on: Փետրվարի 14, 2018

ՀԱՊՀ Վանաձորի մասնաճյուղի ավագ դպրոցում այս անգամ բաս դաս էր. 10-րդ «գ» դասարանում: Աշակերտները (հայոց լեզվի և գրականության ուսուցչուհի՝ Տաթևիկ Աշուղաթոյան) ներկայացրին Սայաթ-Նովայի «Աշխարըս մե փանջարա է…» խաղը։ Սակայն մինչև աշուղ-բանաստեղծի ստեղծագործության վերջակետը համարվող այս խաղին անդրադառնալը տասներորդցիները ներկայացրին մեծ սիրերգուի և մեծ խրատատուի կյանքի ու ստեղծագործության այն մանրամասները, որոնք ի վերջո հանգեցրին պալատից վերջնական վտարմանը, ինչի արդյունքում էլ ծնվել է «Աշխարըս մե փանջարա է…» խաղը։ Բաց դասը հագեցած էր նոր մոտեցումներով, երգով ու պարով: Աշակերտների ոգևորությունը փոխանցվում էր նաև դասալսողներին:


Yandex ծրագրավորման դպրոցի առաջին 26 շրջանավարտները պարգեւատրվել են հավաստագրերով:

Posted by: | Posted on: Հունվարի 29, 2018

Yandex ծրագրավորման դպրոցի շրջանավարտներից 8-ը ՀԱՊՀ Վանաձորի մասնաճյուղի աշակերտներ են:

2017 թվականի հունվարի 21-ից Վանաձորի տեխնոլոգիական կենտրոնում մեկնարկած դասընթացները, որ կազմակերպվեցին շաբաթը երկու անգամ պարբերականությամբ, իրականություն դարձան Ձեռնարկությունների ինկուբատոր հիմնադրամի եւ Yandex ծրագրավորման դպրոցի ու Yandex taxi ընկերության համագործակցության շնորհիվ: Նախագիծը 9-11-րդ դասարանների աշակերտների համար էր, որոնք ցանկություն կհայտնեին ձեռք բերել ծրագրավորման նախնական հմտություններ: Եվ ահա հնարավորությունն ստեղծվեց հենց Վանաձորի տեխնոլոգիականում, երբ հայտարարված մրցույթին ներկայացած 147 դպրոցականներից ընտրվեցին 28-ը՝ մասնակցելով անվճար դասընթացներին:

Աղբյուրը` Loritv.am


16-ամյա Վահե Ասլոյանը ստեղծում է արհեստական բանականությամբ և վիրտուալ իրականությամբ խաղեր

Posted by: | Posted on: Հունվարի 25, 2018

16-ամյա աշակերտ Վահե Ասլոյանը, չնայած իր տարիքին, արդեն մի քանի խաղի հեղինակ է, որոնք համալրված են արհեստական ինտելեկտի և վիրտուալ իրականության տարրերով:
Վահեն Հայաստանի ազգային պոլիտեխնիկական համալսարանի Վանաձորի մասնաճյուղի ավագ դպրոցի սան է, հաճախում է նաև «ԱրՄաթ» ինժեներական լաբորատորիա, իսկ իր ապագա կրթությունը պատկերացնում է հենց ՏՏ ոլորտում:

«Վաղ հասակից սիրում եմ համակարգչով զբաղվել, բացի դրանից, ՏՏ ոլորտը շատ հեռանկարային է, քանի որ անընդհատ զարգանում է»,- պատմում է Վահե Ասլոյանը:

Չնայած երիտասարդ տարիքին՝ Վահեն արդեն աշխատում է X-TECH ընկերությունում:
«Հենց հիմա ես աշխատում եմ X-TECH ընկերությունում՝ որպես խաղերի ծրագրավորող: Առաջին խաղը ստեղծել եմ իմ եղբայր Նարեկ Ասլոյանի հետ՝ KODU ծրագրով: Այն ուներ Deathrun անվանումը: Այդ խաղով մենք հաղթեցինք Վանաձորի Տեխնոլոգիական կենտրոնում կազմակերպված մրցույթում: Հետո իմ ստեղծած Afterworld խաղով մասնակցեցի Ինֆորմացիոն տեխնոլոգիաների ձեռնարկությունների միության կողմից կազմակերպված Digicode 2017 մրցույթին և արժանացա «Լավագույն դիզայն» անվանակարգին:

Հետո ես սկսեցի զբաղվել ավելի պրոֆեսիոնալ ծրագրով՝ unreal engine 4, որի շնորհիվ ես ստեղծեցի խաղ՝ Rising Hope անվանումով, և ցուցադրեցի այն Digitech 2017-ին»:
Ըստ խաղի սցենարի՝ 2054 թվականին բժիշկները փորձել են քաղցկեղի դեմ դեղ արտահանել, բայց չի ստացվել։ Բնակչությունը վարակվել է այդ հիվանդությամբ, բացի մեկ միլիոն մարդուց, որոնց տեղափոխել են «Կալիստո» կոչվող տիեզերական կայան։ Հետագա իրադարձությունները զարգանում են «Կալիստոյում»։ Այս խաղի մեջ առկա է լավ զարգացած արհեստական բանականություն, որը պարբերաբար ուսումնասիրում է խաղացողի կատարած սխալները և ուղղում դրանք հենց խաղացողի դեմ: Խաղի մեջ առկա է նաև 3 գլխավոր հերոս, որոնց խաղի ընթացքում հարկավոր է կառավարել՝ համատեղ ջանքերով փորձությունները հաղթահարելու համար:

« Նախատեսված չափերով աշխատանքները կատարված են, բայց դեռ խաղը թերի վիճակում է»:

Rising Hope խաղում Վահեն աշխատել է արհեստական ինտելեկտի հետ:
«Մշակումներն ամբողջությամբ ես եմ իրականացրել՝ օգտագործելով C++ և Blueprint ծրագրավորման լեզուները: Արհեստական բանականության հետ սովորել եմ աշխատել ինքս՝ անընդհատ աշխատելով նոր և նոր մեթոդներ կիրառել»:

Հիմա աշխատանքները ժամանակավոր դադարեցված են: Վահեի խոսքով՝ խաղը հասանելի կլինի 3-4 ամսից: Խաղը նախատեսվում է թողարկել Steam հարթակում, իսկ հետո՝ ադապտացնել Android և IOS օպերացիոն համակարգերի համար:

Վահեն նշում է, որ այս պահին աշխատում է Virtual Reality նախագծի վրա X-TECH ընկերությունոմ: «Այդ պրոյեկտի անունը Orcz Evolve է: Այն իրենից ներկայացնում է action ժանրի խաղ, որտեղ մենք գտնվում ենք օրկերի և գոբլիների մոլորակում և պետք է պաշտպանենք պորտալը, որպեսզի նրանք չկարողանան ներխուժել Երկիր մոլորակ:
Այս խաղը մեկ ամսից կհայտնվի Steam հարթակում և պարբերաբար կունենա թարմացումներ»,- պատմում է Վահեն:

Աղբյուրը`  168hours


Ամանորյա դիմակահանդես

Posted by: | Posted on: Դեկտեմբերի 23, 2017

Ամանոր… Տարվա ամենասպասված և հրաշքներով լի տոնը նշվեց նաև ՀԱՊՀ Վանաձորի մասնաճյուղի ավագ դպրոցում: Կազմակերպվել էր Դիմակահանդես, որտեղ թևածում էր երգն ու պարը, հումորն ու բարձր տրամադրությունը: Ավագ դպրոցի աշակերտները տոնն էլ ավելի գունագեղ դարձրեցին իրենց հեքիաթային կերպարներով, երգ ու պարով, ձեռքի շնորհքով: Էլ ինչ Ամանոր առանց Ձմեռ պապի և Ձյունանուշի, ովքեր իրենց բարեմաղթանքն ու շնորհավորանքը հղեցին, ցանկանալով խաղաղություն և բարօրություն Հայաստան աշխարհին: Օր, որը դեռ շատ երկար կմնա բոլոր մասնակիցների հուշերում: Շնորհավոր Ամանոր և Սուրբ Ծնունդ…


Աշակերտների այցը «Այբ» դպրոց

Posted by: | Posted on: Դեկտեմբերի 10, 2017

ՀԱՊՀ Վանաձորի մասնաճյուղի ավագ դպրոցի ռոբոտաշինության խմբակի աշակերտները մասնակցեցին «Ծրագրավորման ժամ» միջոցառմանը Երևանի Այբ դպրոցում։ Նրանք ունեցանք շատ հետաքրքիր օր, ձեռք բերեցին նոր ընկերներ, գիտելիքներ և անմոռանալի տպավորություններ: Նման միջոցառումները բարձրացնում են աշակերտների մոտիվացիան, խթանում աշակերտների կրեատիվ մտածողության զարգացումը:


Վիքի-խմբակի մեկնարկը

Posted by: | Posted on: Դեկտեմբերի 5, 2017

2017թ.-ի դեկտեմբերի 5-ին ՀԱՊՀ Վանաձորի մասնաճյուղի ավագ դպրոցում կայացավ Վիքիպեդիայի խմբակի առաջին դասը: Այն անցկացվեց Վանաձորի տեխնոլոգիական կենտրոնի հարմարավետ և ժամանակակից տեխնոլոգիաներով հագեցած լսարանում:

Խմբակի ղեկավար Մանուշ Արզումանյանը մասնակիցներին ներկայացրեց Վիքիպեդիայի ստեղծման պատմությունը, նրա առաքելությունը, նշեց, թե որքան կարևոր անհրաժեշտություն է դարձել 21-րդ դարում էլեկտրոնային այդ հսկա հանրագիտարանը: Կարևորվեց այն փաստը, որ Վիքիպեդիան ազատ տիրույթ է, և յուրաքանչյուր ոք կարող է ոչ միայն ստեղծել, այլ նաև բարելավել մյուսների ստեղծած հոդվածները` ուշադրություն դարձնելով հոդվածի որակի վրա:

Աշակերտները տեղեկացվեցին խմբագրման սկզբունքներին, էթիկայի կանոններին, ստեղծեցին մասնակցային հաշիվներ և կատարեցին իրենց առաջին քայլերը Վիքիպեդիայի անծայրածիր աշխարհում:


eTwinning-ը և մենք

Posted by: | Posted on: Դեկտեմբերի 1, 2017

eTwinning միջազգային ծրագիրը հնարավորություն է տալիս ուսուցիչներին և սովորողներին, ինչպես անհատապես, այնպես էլ խմբերով գրանցվել և օգտվել առցանց գործիքներից, վիրտուալ միջավայրում հանդիպել Եվրոպայի իրենց գործընկերների հետ, իրականացնել գաղափարների և առաջավոր փորձի փոխանակում, ձեռք բերել թիմային աշխատանքի հմտություններ, զարգացնել օտար լեզուների և համակարգչային գիտելիքների իմացությունը, իրականացնել ուսումնական և այլ կրթական առցանց ծրագրեր։ Այն հնարավորություն է տալիս ներկայացնել իրենց դպրոցը, համայնքը և երկիրը, ծանոթանալ եվրոպական տարբեր երկրների պատմությանը, մշակույթին, կրթական համակարգին և այլն:

21-րդ դարի կրթական մարտահրավերների շարքում շատ լուրջ տեղ է գրավում սովորողների մոտիվացիան, քանի որ նոր տեխնոլոգիաների և համացանցի առկայությունը թույլ չեն տալիս սովորողներին իրենց ուշադրությունը կենտրոնացնել ուսուցման գործընթացին: Առաջանում է կարիք նոր մեթոդների և տեխնոլոգիաների կրառմամբ ուսուցումը առավել հետաքրքիր և մատչելի դարձնել: Իթվինինգի պրոյեկտներ իրականցնելիս օգագործվում են տարբեր մեթոդներ, որոնք ուսուցման երբեմն ձանձրալի պրոցեսը դարձնում են առավել գրավիչ, հետաքրքիր ու ցանկալի: Հնարավորություն են տալիս կիսվելու կուտակած առաջավոր փորձով, տեղեկանալ և կրառել Եվրոպական երկրներում մշակված մեթոդներն ու տեխնոլոգիաները, համացանցի բազմաթիվ ռեսուրսներից ընտրել իսկապես արժեքավորն ու արդյունավետը: Ինտերակտիվ գործիքների կիրառմամբ հասնել սովորողների՝ առավել բարձր արդյունքների ցուցադրմանը:  Իթվինինգ համայնքում հաղորդակցության հիմնական լեզուն անգլերենն է, սակայն իրականացվում են պրոյեկտներ ամենատարբեր լեզուներով։

Վերջերս մեր դպրոցը նույնպես միացավ eTwinning միջազգային ծրագրին: Դպրոցի 4 ուսուցիչներ (Նարա Աղամովա, Մանուշ Արզումանյան, Արմինե Ղազարյան, Արմինե Փարսադանյան) 28.11.17թ.-ին մասնակցեցին Վանաձորի հ.4 դպրոցում կայացած  Իթվինինգպլյուս Հայաստան և «Դպրոցների համագործակցության վիրտուալ համայնք» ծրագրերի շրջանակներում կայացած տեղեկատվական հանդիպում սեմինարներին, որը նախաըտեսված էր համաեվրոպական և ազգային համայնքներին միացած բոլոր ուսուցիչների համար։ Նրանք սեմինարին ձեռք բերեցին նախնական գիտելիքներ և հմտություններ ծրագրի մասին: Արդյունքը իրեն ուշացնել չի տա…

 


Էդուարդ Ամիրբեկյանի հոդվածը «Մաթեմատիկան դպրոցում» գիտամեթոդական ամսագրում

Posted by: | Posted on: Նոյեմբերի 27, 2017

«Մաթեմատիկան դպրոցում» գիտամեթոդական ամսագրի 4-րդ պարբերականում իր տեղը գտավ Վանաձորի ՀԱՊՀ մասնաճյուղի ավագ դպրոցի 11-րդ դասարանի տաղանդավոր աշակերտ Էդուարդ Ամիրբեկյանի «Որոշ նկատառումներ պարզ թվերի վերաբերյալ» վերնագրով աշխատանքը: Էդուարդը նաև ռոբոտաշինության խմբակի մասնակից է, Վիքիպեդիայի կամավոր խմբագիր:


Բաց դաս ֆիզիկայից «Գազային օրենքները» թեմայով

Posted by: | Posted on: Նոյեմբերի 27, 2017

27.11.2017-ին Վանաձորի ՀԱՊՀ ավագ դպրոցի 11-րդ «բ» դասարանում (ուսուցչուհի` Լ. Սարգսյան) անցկացվեց բաց դաս ֆիզիկա առարկայից: Դասը վերաբերում էր «Գազային օրենքներին»: Դասարանը բաժանված էր 3 խմբի և նրանցից յուրաքանչյուրը ներկայացնում էր գազային օրենքներից որևէ մեկը: Դասը կազմակերպվել էր ուսուցման ժամանակակից մեթոդներին համապատասխան: Աշակերտները պատրաստել էին դասը հարստացնող պաստառներ, ինչպես նաև գործածելով համակարգիչ ու պրոյեկտոր` խմբերը ներկայացրեցին իրենց պատրաստած պրեզենտացիաները:

 


«Բարին արա» ակցիայի շրջանակներում

Posted by: | Posted on: Նոյեմբերի 24, 2017

ՀԱՊՀ Վանաձորի մասնաճյուղի ավագ դպրոցի 11-րդ «բ» և 11-րդ «գ» դասարանների աշակերտները դասղեկներ Լ. Սարգսյանի և Մ. Գալստյանի հետ միասին «Բարին արա» ակցիայի շրջանակներում այցելեցին «Նարեկ» մանկական հիվանդանոց` փոքրիկներին ուրախացնելու, նրանց հիվանդանոցային միօրինակ առօրյայից մի քիչ կտրելու և ուրախ պահեր պարգևելու համար: Անակնկալներով և հետաքրքիր խաղերով նրանց միացավ նաև ծաղրածուն, ով երգ ու պարով մեծ ուրախություն պարգևեց ինչպես փոքրիկներին, այնպես էլ մեծերին: Երեխաները տպավորված էին նաև իրենց ստացած նվերներից և մեծ հետաքրքրությամբ ուսումնասիրում էին դրանք: Ոչ պակաս տպավորված և ուրախ էին նաև կազմակերպիչները, երբ տեսնում էին փոքրիկների ուրախությունից փայլող աչուկները…